இந்திய கிரிக்கெட்டின் இளம் அதிரடி வீரரான வைபவ் சூர்யவன்ஷிக்கு புதிய பொறுப்பு வழங்கப்பட்டுள்ளது. 15 வயதே ஆகும் அவர், வரவிருக்கும் சையத் முஷ்டாக் அலி டி20 தொடரின் முதல் இரண்டு போட்டிகளில் பீகார் அணியின் கேப்டனாக செயல்பட உள்ளார். இதன் மூலம் முதல்முறையாக மாநிலத்தின் சீனியர் அணியை வழிநடத்தும் வாய்ப்பை அவர் பெற்றுள்ளார்.
நவம்பர் 14 முதல் டிசம்பர் 6 வரை நடைபெறவுள்ள இந்தத் தொடருக்காக பீகார் கிரிக்கெட் சங்கம் 17 பேர் கொண்ட அணியை அறிவித்துள்ளது. ஆல் ரவுண்டர் சூரஜ் காஷ்யப் துணைக் கேப்டனாக நியமிக்கப்பட்டுள்ளார். நவம்பர் 14ஆம் தேதி சவுராஷ்டிரா அணிக்கு எதிரான போட்டியுடன் பீகார் தனது தொடரைத் தொடங்குகிறது.
பீகார் அணியில் இடம்பெற்றுள்ள வீரர்கள்
வைபவ் சூர்யவன்ஷி (கேப்டன்), அலோக் குமார், ஆயுஷ் லோஹருகா (விக்கெட் கீப்பர்), அல்தமாஷ் அஷ்ரப், பரம் குமார் சிங், அன்மோல் குமார் (விக்கெட் கீப்பர்), ரித்விக் ராஜ், சூரஜ் காஷ்யப் (துணைக் கேப்டன்), மயங்க் குமார், ராகவேந்திர பிரதாப், ஆஷிஷ் குமார், வாசுதேவ் பிரதாப் சிங், முகமது இஸார், அமோத் யாதவ், பிரசாந்த் சிங், நவாஸ் கான் மற்றும் ஹிமான்ஷு சிங் ஆகியோர் அணியில் இடம்பெற்றுள்ளனர்.
நவம்பர் 4 முதல் 6ஆம் தேதி வரை நடைபெற்ற தேர்வு முகாம் மற்றும் வீரர்களின் செயல்பாடுகளை ஆய்வு செய்த பிறகு இந்த அணி தேர்வு செய்யப்பட்டுள்ளது. முதல் இரண்டு போட்டிகளுக்கான அணியாக இது அறிவிக்கப்பட்டுள்ளதால், அடுத்தடுத்த போட்டிகளுக்கு முன்பாக வீரர்களின் செயல்பாடுகளைப் பொறுத்து அணியில் மாற்றங்கள் செய்யப்படலாம்.
அதிரடி பேட்டிங்கால் உயர்ந்த சூர்யவன்ஷியின் அந்தஸ்து!
2026ஆம் ஆண்டு வைபவ் சூர்யவன்ஷியின் கிரிக்கெட் பயணத்தில் மிக முக்கியமான ஆண்டாக அமைந்துள்ளது. U19 உலகக் கோப்பை இறுதிப்போட்டியில் இங்கிலாந்துக்கு எதிராக 175 ரன்கள் விளாசிய அவர், தொடரின் சிறந்த வீரர் விருதையும் வென்றார். இதன் மூலம் இந்தியா கோப்பையை கைப்பற்றுவதிலும் முக்கிய பங்காற்றினார்.
அதைத் தொடர்ந்து ராஜஸ்தான் ராயல்ஸ் அணிக்காக ஐபிஎல் தொடரில் விளையாடிய அவர், 776 ரன்கள் குவித்து அதிக ரன்கள் எடுத்த வீரராக சாதனை படைத்தார். அவரது Strike Rate 237.30 ஆக இருந்தது. இந்த அதிரடியான ஆட்டத்தின் மூலம் இந்திய அணியிலும் இடம்பிடித்தார்.
ஜூலை 2026இல் மான்செஸ்டரில் இங்கிலாந்துக்கு எதிரான 2வது T20I போட்டியில் அறிமுகமானதன் மூலம், சர்வதேச கிரிக்கெட்டில் விளையாடிய இளம் இந்திய வீரர் என்ற பெருமையையும் பெற்றார். நியூசிலாந்துக்கு எதிரான 3வது T20I போட்டியில் அபிஷேக் சர்மாவுடன் இணைந்து முதல் 6 ஓவர்களில் விக்கெட் இழப்பின்றி 118 ரன்கள் குவித்ததும் அவரது அதிரடியான வளர்ச்சிக்கு மற்றொரு சான்றாக அமைந்தது.
கடந்த சீசனில் சையத் முஷ்டாக் அலி தொடரில் பீகார் அணி முதல் ஆறு போட்டிகளிலும் தோல்வியடைந்து ஏமாற்றமளித்தது. இந்த முறை இளம் கேப்டன் தலைமையில் அணியின் செயல்பாடு எப்படி இருக்கும் என்பதே கவனிக்க வேண்டிய விஷயம். குறிப்பாக நவம்பர் 22ஆம் தேதி தமிழ்நாடு அணிக்கு எதிராக பீகார் மோதவுள்ளது.
