நேற்று இந்திய அணி தென் ஆப்பிரிக்கா அணிக்கு எதிரான போட்டியில் 76 ரன்கள் வித்தியாசத்தில் படுதோல்வி அடைந்தது. இந்த போட்டியில் இந்திய அணி நிர்வாகம் எடுத்த மோசமான முடிவுகள்தான் தோல்விக்கு காரணமாக அமைந்திருக்கிறது என ஸ்ரீகாந்த் விமர்சனம் செய்திருக்கிறார்.
இந்த போட்டியில் முதல் ஓவரை ஆப்-ஸ்பின்னர் வீசி விக்கெட் எடுத்து இருந்த நிலையில் மூன்றாவது இடத்தில் வலதுகை வீரர் சூரியகுமார் யாதவ் வந்திருக்கலாம். மேலும் ஐந்தாவது இடத்தில் ஹர்திக் பாண்டியா விளையாடியிருந்தால் சரியாக இருக்கும். ஆனால் சிறப்பான பேட்ஸ்மேன் அவரை ஏழாவது இடத்தில் அனுப்பினார்கள்.
இதுகுறித்து ஸ்ரீகாந்த் தனது விமர்சனத்தில் “நேற்றைய போட்டியில் நம்மை அவமானப்படுத்தி விட்டார்கள். நாம்தான் எதிரணிகளுக்கு இப்படி செய்வோம்; ஆனால் நமக்கே அது நடந்து விட்டது. இந்த போட்டியில் சூரியகுமார் யாதவ் மூன்றாவது இடத்தில் பேட்டிங் செய்ய வருவதற்கு சரியான காரணங்கள் இருந்தது. ஆனால் அவர் வரவில்லை. ரைட் லெப்ட் காமினேஷன் என்பதெல்லாம் முட்டாள்தனமானது. உங்கள் மனநிலை சரியாக இருந்தால் போதும்”
“அடுத்து ஹர்திக் பாண்டியா அழுத்தமான நேரங்களில் ஐந்தாவது இடத்தில் மிகச் சிறப்பாக விளையாடியிருக்கிறார்; ஆனால் அவரை ஏழாவது இடத்தில் அனுப்பி வைக்கிறார்கள். இது ஒரு பைத்தியக்காரத்தனமான முடிவு. இதுவெல்லாம்தான் இந்திய அணியின் தோல்விக்கு முக்கிய காரணமாக இருந்தது” என்று கூறியிருக்கிறார்.
