மேற்கிந்தியத் தீவுகளுக்கு எதிரான டி20 போட்டியில் இந்திய அணி தோல்வியைச் சந்தித்தாலும், இளம் வேகப்பந்து வீச்சாளர்கள் மீது நம்பிக்கை வைத்துப் பேசியிருக்கிறார் சஞ்சு சாம்சன். குறிப்பாக, முன்னணி வேகப்பந்து வீச்சாளர் ஜஸ்பிரித் பும்ரா அணியில் இல்லாத சூழலிலும், இந்திய அணியிடம் திறமையான இளம் வீரர்கள் இருப்பதாக அவர் தெரிவித்துள்ளார்.
இந்தப் போட்டியில் பேட்டிங்கில் அதிரடி காட்டிய சஞ்சு சாம்சன், வெறும் 23 பந்துகளில் 56 ரன்கள் குவித்தார். பந்துவீச்சில் அர்ஷ்தீப் சிங் மற்றும் பிரின்ஸ் யாதவ் ஆகியோரின் செயல்பாடுகளும் அவரைக் கவர்ந்துள்ளன. இளம் வீரர்களுக்குத் தொடர்ந்து வாய்ப்பளித்து ஆதரவளித்தால், அவர்கள் சிறந்த பந்துவீச்சாளர்களாக உருவெடுப்பார்கள் என்றும் நம்பிக்கை தெரிவித்துள்ளார்.
இதுகுறித்துப் பேசிய சஞ்சு சாம்சன், “ஜஸ்பிரித் பும்ராவுக்கு மாற்றாக யாரையும் கொண்டு வர முடியாது. அவர் ஒரு தலைமுறைக்கு ஒருமுறை வரும் பந்துவீச்சாளர். அவர் நமது அணியில் இருப்பது நமது அதிர்ஷ்டம். அதேசமயம், நம்மிடம் சிறந்த திறமையாளர்கள் உருவாகி வருகிறார்கள். அர்ஷ்தீப் சிறப்பாகச் செயல்படுகிறார். பிரின்ஸ் யாதவும் கடந்த சில போட்டிகளில் சிறப்பாகப் பந்துவீசியிருக்கிறார். இவர்களுக்கு அதிக வாய்ப்புகளையும் ஆதரவையும் கொடுத்தால், இன்னும் சிறந்த பந்துவீச்சாளர்களாக மாறுவார்கள்” என்று தெரிவித்துள்ளார்.
