இந்திய ஒருநாள் அணியின் பேட்டிங் வரிசையில் கே.எல். ராகுலுக்கு முன்னதாக அக்சர் படேல் களமிறக்கப்படுவது ஏன் என்ற கேள்விக்கு இந்திய அணியின் பேட்டிங் பயிற்சியாளர் சிதான்ஷு கோடக் விளக்கம் அளித்துள்ளார். ராகுலுக்கு 5வது இடத்தில் மிகச்சிறந்த சாதனை இருந்தாலும், இடதுகை – வலதுகை பேட்டிங் கூட்டணியை உருவாக்குவதற்கும், போட்டியின் சூழலுக்கு ஏற்ப வீரர்களைப் பயன்படுத்துவதற்கும் அணி நிர்வாகம் முக்கியத்துவம் கொடுப்பதாக அவர் தெரிவித்துள்ளார்.
நியூசிலாந்துக்கு எதிரான ஒருநாள் தொடரில் இந்திய அணியின் பேட்டிங் வரிசை குறித்து விவாதங்கள் எழுந்துள்ளன. குறிப்பாக, 5வது இடத்தில் விளையாடி வந்த கே.எல். ராகுல் தற்போது 6வது இடத்திற்கு மாற்றப்பட்டுள்ளார். அவருக்குப் பதிலாக அக்சர் படேலுக்கு அந்த இடம் வழங்கப்படுகிறது. ஹாமில்டனில் நடைபெறவுள்ள 3வது ஒருநாள் போட்டிக்கு முன்னதாக செய்தியாளர்களிடம் பேசிய கோடக், இந்த முடிவுக்கான காரணங்களை விளக்கினார்.
இடதுகை பேட்டரான அக்சர், வலதுகை பேட்டரான ஸ்ரேயாஸ் ஐயர் போன்ற வீரர்களுடன் இணைந்து விளையாடும்போது பேட்டிங் வரிசையில் இடதுகை – வலதுகை கூட்டணியை உருவாக்க முடியும். அதேபோல், போட்டியின் இறுதிக்கட்டத்தில் ஆட்டத்தை முடிக்கும் திறன் ராகுலுக்கு இருப்பதால் அவரை 6வது இடத்தில் பயன்படுத்துவது அணிக்கு உதவும் என்றும் கோடக் கூறியுள்ளார். மேலும், 5வது இடத்தில் விளையாடிய அனுபவம் அக்சருக்கும் இருப்பதாக அவர் சுட்டிக்காட்டினார்.
5வது இடத்தில் ராகுலின் சாதனை vs அக்சரின் செயல்பாடு!
புள்ளிவிவரங்களைப் பார்த்தால் ராகுலை 5வது இடத்திலிருந்து மாற்றியிருப்பது ஆச்சரியமாகவே உள்ளது. இதுவரை அந்த இடத்தில் 36 இன்னிங்ஸ்களில் விளையாடியுள்ள அவர், 1,646 ரன்கள் குவித்துள்ளார். சராசரி 68.58 ஆகவும், Strike Rate 103.19 ஆகவும் உள்ளது. இதில் 4 சதங்கள், 10 அரைசதங்கள் அடங்கும்.
மறுபுறம், அக்சர் படேல் 5வது இடத்தில் 13 இன்னிங்ஸ்களில் விளையாடி 365 ரன்கள் எடுத்துள்ளார். அவரது சராசரி 30.41, Strike Rate 87.11. இந்த இடத்தில் அவர் ஒரு அரைசதம் மட்டுமே அடித்துள்ளார். இங்கிலாந்து சுற்றுப்பயணத்தின்போது அந்த அரைசதம் வந்தது. இருப்பினும், தலைமைப் பயிற்சியாளர் கவுதம் கம்பீர் அக்சருக்கு பேட்டிங் வரிசையில் முன்னுரிமை அளித்து வருகிறார்.
நியூசிலாந்துக்கு எதிரான முதல் ஒருநாள் போட்டியில் அக்சர் டக் அவுட் ஆனார். இரண்டாவது போட்டியில் 17 பந்துகளில் 7 ரன்கள் மட்டுமே எடுத்தார். அதே நேரத்தில், இரண்டாவது போட்டியில் 47 ரன்களுக்கு 4 விக்கெட்டுகளை இழந்து இந்தியா தடுமாறியபோது களமிறங்கிய ராகுல், மழையால் ஆட்டம் நிறுத்தப்படுவதற்கு முன்பு 38 பந்துகளில் 26 ரன்களுடன் ஆட்டமிழக்காமல் இருந்தார். இந்தியா DLS முறையில் 4 ரன்கள் வித்தியாசத்தில் வெற்றி பெற்றது.
ராகுலை பாராட்டிய பேட்டிங் பயிற்சியாளர்!
அக்சருக்கு முன்னுரிமை வழங்கப்படுவதால் ராகுலின் திறமையை அணி நிர்வாகம் குறைத்து மதிப்பிடுவதாக அர்த்தமில்லை என்றும் கோடக் தெளிவுபடுத்தியுள்ளார். டெஸ்ட் கிரிக்கெட்டில் தொடக்க வீரராகவும், வெள்ளைப் பந்து கிரிக்கெட்டில் மிடில் ஆர்டரிலும், தேவைப்பட்டால் கடைசி 5 ஓவர்களில் விளையாடும் வீரராகவும் ராகுலால் செயல்பட முடியும் என்று அவர் பாராட்டியுள்ளார்.
மேலும், தாம் பயிற்சிக் குழுவில் இணைந்த பிறகு ராகுல் பேட்டிங் செய்ய வாய்ப்பு கிடைத்த பல போட்டிகளில் அணிக்கு பங்களிக்கத் தவறியதாக நினைவில்லை என்றும் தெரிவித்துள்ளார். நெருக்கடியான சூழலிலும் பதற்றமின்றி விளையாடுவது, ஸ்டிரைக்கை சுழற்றுவது, தேவையான நேரத்தில் பவுண்டரிகளும் சிக்ஸர்களும் அடிப்பது ஆகியவை ராகுலின் முக்கிய பலம் என்றும் கோடக் குறிப்பிட்டுள்ளார்.
இந்நிலையில், நியூசிலாந்துக்கு எதிரான 3வது ஒருநாள் போட்டி நவம்பர் 10ஆம் தேதி நடைபெறுகிறது. இந்தப் போட்டிக்குப் பிறகு ராகுல் இரண்டு போட்டிகள் கொண்ட டெஸ்ட் தொடருக்கான இந்திய அணியுடன் இணைய உள்ளார். இதனால் ஒருநாள் போட்டியில் அக்சருக்கு வழங்கப்பட்டுள்ள 5வது இடம், அணியின் தற்போதைய பேட்டிங் திட்டத்தைப் புரிந்துகொள்ள முக்கியமானதாக இருக்கும்.
