மேஜர் லீக் கிரிக்கெட் தொடரில் டெக்ஸாஸ் சூப்பர் கிங்ஸ் அணியை எதிர்த்து வாஷிங்டன் ஃபிரீடம் அணி களமிறங்கியது. இந்த போட்டி மழை காரணமாக 5 ஓவர்கள் கொண்ட போட்டியாக நடத்தப்பட்டது. இந்த போட்டியில் டாஸ் வென்ற வாஷிங்டன் ஃபிரீடம் அணியின் கேப்டன் மேக்ஸ்வெல் பவுலிங்கை தேர்வு செய்தார். காயம் காரணமாக் டூ ப்ளசி இந்த போட்டியில் களமிறங்கவில்லை.
மிட்சல் ரிட்டையர்ட் அவுட்
இதன்பின் டிஎஸ்கே அணி தரப்பில் கேப்டன் ஸ்டாய்னிஸ் – மிட்சல் இணை தொடக்கம் கொடுத்தது. 2வது பந்திலேயே ஸ்டாய்னிஸ் 2 ரன்களில் ஆட்டமிழக்க, சுபம் ரஞ்சனே களம் புகுந்தார். அவர் அதிரடியாக விளையாடிய போது, மிட்சலால் 5 பந்துகள் வரை எதிர்கொண்டு ஒரு பவுண்டரியை கூட அடிக்க முடியவில்லை. இதனால் அவர் ரிட்டையர்ட் அவுட்டாகி வெளியேறினார். இதனால் 3 ஓவர்களில் டிஎஸ்கே அணி 34 ரன்களை எடுத்திருந்தது.
பின் டோனவன் ஃபெரைரா களம் புகுந்தார். நெட்ரவால்கர் வீசிய 4வது ஓவரிலேயே 2 சிக்ஸ், 2 பவுண்டரி உட்பட 25 ரன்கள் சேர்க்கப்பட, 5வது ஓவரில் ஹாட்ரிக் சிக்ஸ் உட்பட 4 சிக்ஸ் விளாசி தள்ளினார். இதனால் டிஎஸ்கே அணி 5 ஓவர்களில் 87 ரன்களை குவித்தது. சிறப்பாக ஆடிய டோனவன் ஃபெரைரா 9 பந்துகளில் 37 ரன்களை விளாசினார்.
பிளே ஆஃப் சான்ஸ்
தொடர்ந்து வாஷிண்டன் ஃபிரீடம் அணிக்காக மிட்சல் ஓவன் – ரச்சின் ரவீந்திரா கூட்டணி தொடக்கம் கொடுத்தது. பர்கர் வீசிய முதல் ஓவரிலேயே ரச்சின் 10 ரன்களிலும், மேக்ஸ்வெல் டக் அவுட்டாகியும் வெளியேற, 2வது ஓவரில் மிட்சல் ஓவன் 7 ரன்களில் ஆட்டமிழந்தார். கிளென் பிலிப்ஸ் மட்டும் சில பவுண்டரிகளை அடிக்க, வாஷிங்டன் ஃபிரீடம் அணி 5 ஓவர்களில் 4 விக்கெட்டுகள் இழப்பிற்கு 44 ரன்களை மட்டுமே சேர்த்து தோல்வி அடைந்தது.
இதன் மூலமாக டெக்ஸாஸ் சூப்பர் கிங்ஸ் அணி 8 போட்டிகளில் விளையாடி 6 வெற்றி, 2 தோல்வியுடன் 12 புள்ளிகள் பெற்று பிளே ஆஃப் சுற்றுக்கு தகுதி பெற்றுள்ளது. கடந்த 2 சீசன்களாக டிஎஸ்கே அணி கோப்பையை வெல்ல முடியாமல் தவித்து வருகிறது. இம்முறை டெக்ஸாஸ் அணி அபாரமான ஃபார்மில் இருப்பதால், சிஎஸ்கே அணியின் ரசிகர்கள் உற்சாகத்தில் இருக்கின்றனர்.
