அனல் பறக்கவுள்ள இந்தியா – ஆஸ்திரேலியா இடையேயான 5 போட்டிகள் கொண்ட பார்டர் கவாஸ்கர் டெஸ்ட் தொடர் இன்னும் ஒரு வாரத்தில் துவங்கவுள்ளது. முதல் போட்டி பெர்த் மைதானத்தில் நவம்பர் 22 நடக்கிறது.
கடந்த பத்து ஆண்டுகளாக இந்திய அணியே பார்டர் கவாஸ்கர் தொடரில் ஆதிக்கம் செலுத்தி வருகிறது. ஆஸ்திரேலியா மண்ணில் கூட தொடர்ந்து 2 முறை வரலாற்று வெற்றிகளைப் பெற்றுள்ளனர். கோப்பையை இந்த முறை எப்படியாவது வென்றாக வேண்டும் அதுவும் சொந்த மைதானத்தில் தொடர்ச்சியாக மூன்றாவது முறை மண்ணைக் கவ்வக் கூடாது என்ற வெறியில் ஆஸ்திரேலியா அணி உள்ளது.
இதற்கு முன்பு முன்னாள் ஆஸ்திரேலியா வீரர் மேத்யூ ஹேடன் தன் கணிப்பைக் கொடுத்துள்ளார். ஆஸ்திரேலியா அணி இந்தத் தொடரை சொந்த மைதானத்தில் 3-1 என்ற கணக்கில் வென்று கோப்பையைக் கைப்பற்றும் என ஹேடன் நம்புகிறார். அதே சமயம் இந்தத் தொடர் யார் பக்கம் போகும் என்பதை முடிவு செய்பவர்கள் இந்த 4 வீரர்கள் தான் எனக் குறிப்பிடும் உள்ளார்.
மேத்யூ ஹேடன் கூறியதாவது, ” என்னுடைய கணிப்பு ஆஸ்திரேலியா 3 – 1 என இந்தத் தொடரை வெல்லும். ஆஸ்திரேலியா அணியைப் பொறுத்தவரை ஸ்டீவ் ஸ்மித் மற்றும் பேட் கம்மின்ஸ், இந்திய அணியில் விராட் கோலி மற்றும் பும்ராவின் ஃபார்ம் தான் இந்தத் தொடர் யார் பக்கம் போகும் என்பதைத் தீர்மானிக்கும். ” என்றார்.
மேலும், ஆஸ்திரேலிய அணியின் முக்கிய பேட்டிங் ஆர்டர் குறித்தும் அவர் பேசியுள்ளார். ஓய்வு பெற்றுள்ள டேவிட் வார்னரின் இடத்தை இளம் வீரர் நாதன் மெக்ஸ்வீனி நிறப்பவுள்ளார். ” டேவிட் வார்னர் வாழ்நாளில் நாம் பார்க்கும் தலைசிறந்த வீரர்களில் ஒருவர். அவரின் இடத்தை நிரப்புவது மிகவும் கடினமான ஒன்று. ஆனால் துவக்க ஆட்டக்காரர் மெக்ஸ்வீனி அதனைச் செய்வார் என நம்புகிறேன். ” என்றார் ஹேடன்.
பேட்டிங்கில் மெக்ஸ்வீனி அடுத்த ஸ்மித், லபூஷேன் அளவுக்கு திறன் கொண்டவர் என ஆஸ்திரேலியா நிர்வாகம் பெரிதாக எதிர்பார்க்கிறது.
