வருகிற பிப்ரவரி 19ஆம் தேதி பாகிஸ்தானில் 8 ஆண்டுகளுக்குப் பிறகு ஐசிசி சாம்பியன்ஸ் டிராபி தொடர் நடக்கிறது. தொடருக்கு முன்பு பாகிஸ்தான் வீரர்களுக்கு வாழ்த்து தெரிவித்து, இந்திய அணியுடனான போட்டியைப் பற்றி சீரியசாக பேசியுள்ளார் பாகிஸ்தான் பிரதமர் ஷெபாஸ் ஷெரீஃப்.
சாம்பியன்ஸ் டிராபி தொடருக்காக சீரமைக்கும் பணியில் இருந்த பாகிஸ்தான் மைதானங்களை நேற்று திறந்து வைக்கும் நிகழ்ச்சியில் கலந்து கொண்டார் பாகிஸ்தான் பிரதமர் ஷெரீஃப். அங்கு அவர், சாம்பியன்ஸ் டிராபி வெல்வது மட்டுமல்லாமல் இந்திய அணியை இம்முறை வீழ்த்துவதே முக்கியம் எனக் கூறியுள்ளார்.
அவர் பேசியதாவது, ” நாம் ஒரு நல்ல அணியைக் கொண்டுள்ளோம். அண்மையில் அணி சிறப்பாகவும் விளையாடி வருகிறது. நம்முடைய இலக்கு, சாம்பியன்ஸ் டிராபி வெல்வது மட்டுமல்ல, துபாயில் நடக்கும் போட்டியில் இந்தியாவை தோற்கடிக்க வேண்டும். பாகிஸ்தான் அணியின் பின் நாடே நிற்கிறது. ” என்றார்.
மேலும், ” நம் நாட்டில் 29 ஆண்டுகளுக்குப் பிறகு ஐசிசி தொடர் நடக்கிறது. வருகிற சாம்பியன்ஸ் டிராபியில் நம் அணி சிறப்பாக செயல்பட்டு நாட்டைப் பெருமைப்படுத்துவர் என்பதில் எனக்குப் பெரிய நம்பிக்கை இருக்கிறது. ” என வீரர்களுக்கு வாழ்த்து தெரிவித்தார் பாகிஸ்தான் பிரதமர்.
இந்தியா – பாகிஸ்தான் ஒரு நாடுகளுக்கு இடையேயான போட்டி பெரிய பரபரப்புக்கு உள்ளானது. ஐசிசி தொடர்களில் எப்போதும் இந்திய அணியே ஆதிக்கம் செலுத்தி வந்துள்ளது. கடைசியாக துபாயில் நடந்த 2021 டி20ஐ போட்டியில் இந்தியாவை வீழ்த்தியது பாகிஸ்தான்.
பாகிஸ்தானில் விளையாட இந்தியா மறுத்ததால் துபாயில் இந்திய அணியின் போட்டிகள் நடக்கின்றன. பிப்ரவரி 23 அன்று ஒரு அணிகளும் மோதும் போட்டியில் 2017 சாம்பியன்ஸ் டிராபி ஃபைனல் தோல்விக்கு இந்திய அணி பழி தீர்க்குமா ? அல்ல 2021 போல துபாயில் நடக்கும் போட்டி என்பதால் பாகிஸ்தான் மீண்டும் இந்திய அணியை வெல்லுமா என்பதைப் பொறுத்திருந்து தான் பார்க்க வேண்டும்.
